Arxiv 2018

2018-ci il mayın 13-də Bakı şəhərində üçüncü dəfə marafon yarışı keçiriləcək. Marafon Heydər Əliyev Fondunun təşəbbüsü, Dənizkənarı Bulvar İdarəsinin, Bakı Olimpiya Stadionunun dəstəyi ilə təşkil olunur. “Bakı Marafonu-2018” layihəsinin eksklüziv tərəfdaşı “AzercellTelekom” şirkətidir.  Layihənin icrasını isə “SMG” (“Sport Marketing Group”) şirkəti həyata keçirir. 

“Bakı Marafonu - 2018”in məqsədi idmanın inkişafına dəstək göstərmək, sağlam həyat tərzini təbliğ etmək, insanları xeyirxah amallar ətrafında bir araya gətirməkdir. 
“Bakı Marafonu - 2018” Dövlət Bayrağı Meydanından başlayaraq Bakı Olimpiya Stadionuna qədər 21 kilometr məsafəni əhatə edəcək.

İnanırıq ki, “Bakı Marafonu - 2018” individual fiziki sağlamlığa, insanların kütləvi və mütəmadi şəkildə idmanla məşğul olmasına, xeyirxah amallar ətrafında həmrəyliyə öz töhfəsini verəcəkdir.  

Ötən marafonlarda olduğu kimi, bu il də hər 3 kilometrdən bir yardım məntəqələri quraşdırılacaq. Yardım məntəqələrində tibbi yardım nöqtəsi, sanitar qovşaq fəaliyyət göstərəcək və su paylanılacaq.

Qeyd edək ki, Bakıda ilk marafon yarışı 2016-cı il mayın 1-də, ikinci yarış isə 2017-ci il aprelin 30-da Heydər Əliyev Fondunun təşəbbüsü ilə “Küləyə qalib gəl” şüarı altında keçirilib. Hər iki marafona Dövlət Bayrağı Meydanından start verilib, yarışın fan zonası isə finiş nöqtəsində - Bakı Olimpiya Stadionunda yaradılıb. Burada iştirakçılar, eləcə də uşaqlar üçün xüsusi əyləncə proqramları təşkil olunub. 

Yarışların təltifetmə mərasimi də Bakı Olimpiya Stadionunda keçirilib. 

Marafonların qalibləri iki kateqoriya – kişi və qadınlar üzrə müəyyən olunub.

“Bakı Marafonu - 2016” da kişilər arasında Azərbaycandan Namiq Əsədov birinci, Gürcüstandan Giorgi Damenia ikinci, Azərbaycandan Tural Sadıxlı isə üçüncü yerin sahibi olub. Qadınlar arasında Azərbaycan vətəndaşı Raidə Aslanova birinci, britaniyalı Nataşa Piterson ikinci, Azərbaycandan Rəqsanə Rəcəbli isə üçüncü yeri qazanıb. 

“Bakı Marafonu - 2017”də isə kişilər arasında Türkiyə vətəndaşları Veysi Aslan birinci, Üzeyir Söyləməz ikinci, rusiyalı Vladislav Demyanov üçüncü yerə çıxıb. Qadınlar arasında isə finişə Türkiyə vətəndaşı Yayla Kılıc birinci, ukraynalı Valentina Poltovska ikinci və iranlı Parisa Arab üçüncü çatıb.

Kişi və qadın kateqoriyaları üzrə ilk yerin sahibi 3000, ikinci yeri tutan 2000, üçüncü yerə çıxan isə 1000 AZN məbləğində mükafat və hədiyyələrlə, eləcə də medal və sertifikatlarla təltif ediliblər.

Qeyd edək ki, Bakıda 2016 və 2017-ci illərdə təşkil olunan yarımarafonlarda 20 mindən çox iştirakçı qeydiyyatdan keçmişdi. Heydər Əliyev Fondunun vitse-prezidenti Leyla Əliyevanın iştirakı ilə keçirilən bu yarışlara Azərbaycan vətəndaşları ilə yanaşı, ölkəmizdə yaşayıb-çalışan əcnəbilər, İspaniya, Fransa, Qazaxıstan, Özbəkistan, Türkmənistan, Ukrayna, Səudiyyə Ərəbistanı, İran, Hindistan, Çex Respublikası, Meksika və digər ölkələrin Azərbaycandakı səfirliklərinin, “BP Azərbaycan” şirkətinin, Böyük Britaniyanın Azərbaycana Birgə Yardım (UAFA) təşkilatının nümayəndələri də qoşulmuşdu. Yarımarafonlarda ABŞ, Avstriya, Almaniya, Böyük Britaniya, Birləşmiş Ərəb Əmirlikləri, İspaniya, Fransa, Rusiya, Polşa, İran, Ukrayna, Gürcüstan, Keniya və digər ölkələrdən turistlər də iştirak etmişdi. Layihə region sakinləri tərəfindən böyük maraqla qarşılandığından 2017-ci il sentyabrın 17-də Gəncə şəhərində də yarımarafon təşkil olunmuşdu. 



Loqonun fəlsəfəsi


Loqo özündə Bakı şəhərinin və marafon yarışının xüsusiyyətlərini əks etdirən elementləri birləşdirir.

Külək - Bakının əsas rəmzlərindən biri hesab edilir. Marafonun “Küləyə qalib gəl” şüarı da Bakının küləklər şəhəri olmasından irəli gələrək seçilib. 

Biz inanırıq ki, “Küləyə qalib gəl” şüarı marafon iştirakçılarını məşq, motivasiya, intizam və zamanın səmərəli bölüşdürülməsi kimi vacib faktorların öhdəsindən gəlməyə həvəsləndirəcək və onları finiş xəttinə qədər aparacaq.

Loqoda diqqəti çəkən digər element isə lentdir. Lent dörd əsas dəyəri ifadə edir: birlik, həmrəylik, pozitivlik və sağlamlıq.   

Açıq yaşıl - lentlərin əsas rəngidir. Bu rəng Azərbaycanda marafonun yaranmasını, eləcə də marafonun sağlamlıq və birlik baxımından müsbət çalarlar daşıdığını ifadə edir.  

Marafonun strateji hədəfləri:


- İdmanın inkişafında dəstək göstərmək;
- Sağlam həyat tərzini təbliğ etmək; 
- “Bakı Marafonu”nu nüfuzlu marafonlardan birinə çevirmək və xarici idmançıları, qonaqları bu yarışda iştirak etməyə həvəsləndirmək, o cümlədən turistləri ölkəmizə cəlb etmək.   
                   

Dəyərlər


“Bakı Marafonu”nun daşıdığı dəyərlər onun loqosunun əsas elementi olan lentdə öz əksini tapıb. Lent dörd əsas dəyəri ifadə edir: birlik, həmrəylik, pozitivlik və sağlamlıq. Lentin əks etdirdiyi hər bir dəyər xüsusi məna daşıyır:

Birlik - xeyirxah və sağlam məqsədlər ətrafında insanları birləşdirmək;
Sağlamlıq - gəncləri fiziki cəhətdən daha güclü olmağa və idman vasitəsilə daha sağlam həyat tərzi keçirməyə təşviq etmək;
Həmrəylik - insanları xeyirxah məqsədlər naminə birləşdirmək;
Pozitivlik - yarışda iştirak etməklə pozitivliyi təşviq etmək.      

Heydər Əliyev Fondunun təşkilatçılığı ilə “Bakı Marafonu 2019” keçirilib

05 May 2019 Xəbərlər
Mayın 5-də Heydər Əliyev Fondunun təşkilatçılığı ilə “Bakı Marafonu 2019” keçirilib. Marafonda Bakı Media Mərkəzinin prezidenti Arzu Əliyeva da iştirak edib. “Küləyə qalib gəl” şüarı altında artıq dördüncü ildir təşkil olunan yarımarafon Dövlət Bayrağı Meydanından start götürərək, Bakı Olimpiya Stadionuna qədər 21 kilometr məsafəni əhatə edib. Layihə idmanın inkişafına dəstək göstərmək, sağlam həyat tərzini təbliğ etmək, və insanları xeyirxah amallar ətrafında bir araya gətirmək məqsədi daşıyır.
Hər il daha çox iştirakçı sayı ilə diqqət çəkən marafonda bu dəfə 22 min 320 şəxs qeydiyyatdan keçib. Yarışa Azərbaycan vətəndaşları ilə yanaşı, bir sıra digər ölkələrdən də iştirakçılar gəlib. Marafonda ABŞ, Avstriya, BƏƏ, Böyük Britaniya, Cənubi Afrika, Fransa, İran, Rusiya, İspaniya, İtaliya, Türkiyə, Ukrayna, Uqanda və digər ölkələrdən qoşulanlar var. Eyni zamanda, Azərbaycanda yaşayıb-işləyən 300-dən çox əcnəbi, o cümlədən BƏƏ, Çin, Hindistan, İraq, İran, Qazaxıstan, Litva, Mərakeş, Özbəkistan, Türkiyə, Türkmənistan və digər ölkələrin Azərbaycandakı səfirlik və diplomatik nümayəndəliklərinin təmsilçiləri marafonçular sırasında olub. 
Ətraflı Oxu

"Baku Marathon Club" ilə məşq - 23 aprel

23 Apr 2019 Məşqlər
Xanımlar və cənablar, "Baku Marathon Club" ilə məşqlərə qoşularaq həm marafona hazırlaşa, həm də eksklüziv tərəfdaşımız Azercell-dən iki telefon qazana bilərsiniz!  Belə ki, məşqlərdə fəal olan iki iştirakçı "Baku Marathon Club"ın məşqçiləri tərəfindən seçiləcək və mükafatlandırılacaq.


Ətraflı Oxu

"Baku Marathon Club" ilə məşq - 21 aprel

21 Apr 2019 Məşqlər
Xanımlar və cənablar, "Baku Marathon Club" ilə məşqlərə qoşularaq həm marafona hazırlaşa, həm də eksklüziv tərəfdaşımız Azercell-dən iki telefon qazana bilərsiniz!  Belə ki, məşqlərdə fəal olan iki iştirakçı "Baku Marathon Club"ın məşqçiləri tərəfindən seçiləcək və mükafatlandırılacaq.


Ətraflı Oxu

Təşkilatçı

Tərəfdaşlar və Sponsorlar